ரொறன்ரோ மாநகர முதல்வர் தேர்தலில் தனது பிரதான போட்டியாளரான பிராட் பிராட்போர்டை 1.28 இலட்சத்திற்கும் அதிகமான வாக்குகள் வித்தியாசத்தில் தோற்கடித்து, ஒலிவியா சௌ மீண்டும் முதல்வராகத் தெரிவாகியுள்ளார்.
கனடாவின் ஒன்ராறியோ மாகாணத்தில் ஒக்டோபர் 26ஆம் திகதி நடைபெற்ற உள்ளூராட்சித் தேர்தலில், ரொறன்ரோ மாநகர முதல்வர் பதவிக்கான போட்டி பெரும் எதிர்பார்ப்பை ஏற்படுத்தியிருந்தது.
இந்நிலையில், தற்போதைய முதல்வரான ஒலிவியா சௌ (Olivia Chow), தனது பிரதான போட்டியாளரும் முன்னாள் நகரசபை உறுப்பினருமான பிராட் பிராட்போர்டை (Brad Bradford) தோற்கடித்து, இரண்டாவது முறையாக முதல்வர் பதவியைத் தக்கவைத்துள்ளார்.
வெளியாகியுள்ள உத்தியோகபூர்வமற்ற தேர்தல் முடிவுகளின்படி,
- ஒலிவியா சௌ: 5,32,201 வாக்குகள் (54.2%)
- பிராட் பிராட்போர்ட்: 4,04,013 வாக்குகள் (41.1%)
இதன்படி, ஒலிவியா சௌ 1,28,188 வாக்குகள் வித்தியாசத்தில் வெற்றிபெற்றுள்ளார்.
வாழ்க்கைச் செலவுகளைக் குறைத்தல், மலிவு விலையிலான வீடமைப்புத் திட்டங்களை விரிவுபடுத்துதல், வாடகைதாரர்களின் உரிமைகளைப் பாதுகாத்தல் மற்றும் பொதுப் போக்குவரத்துச் செலவுகளைக் குறைத்தல் உள்ளிட்ட வாக்குறுதிகளை முன்வைத்து ஒலிவியா சௌ தேர்தல் பிரசாரத்தை முன்னெடுத்திருந்தார்.
“நான் அனைவருக்குமான முதல்வர்”
தனது வெற்றியைத் தொடர்ந்து ஆதரவாளர்கள் மத்தியில் உரையாற்றிய ஒலிவியா சௌ, ரொறன்ரோ மக்கள் தங்களது தீர்ப்பை வழங்கிவிட்டதாகத் தெரிவித்தார்.
தனக்கு வாக்களித்தவர்கள், வாக்களிக்காதவர்கள் மற்றும் வாக்களிக்கும் உரிமை இல்லாதவர்கள் என ரொறன்ரோவைத் தங்களது இல்லமாகக் கொண்டு வாழும் அனைவரையும் பிரதிநிதித்துவப்படுத்தும் முதல்வராகத் தொடர்ந்து செயற்படுவேன் என்ற உறுதிப்பாட்டையும் அவர் வெளியிட்டார்.
மேலும், தேர்தல் வெற்றியைக் கொண்டாடிய பின்னர், நகர மக்கள் எதிர்கொள்ளும் பிரச்சினைகளுக்குத் தீர்வு காணும் பணிகளைத் தொடரவுள்ளதாகவும் அவர் தெரிவித்தார்.
தோல்வியை ஏற்றுக்கொண்ட பிராட் பிராட்போர்ட்
இதனிடையே, தேர்தல் தோல்வியை ஏற்றுக்கொண்ட பிராட் பிராட்போர்ட், ஒலிவியா சௌவைத் தொலைபேசியில் தொடர்புகொண்டு தனது வாழ்த்துகளைத் தெரிவித்தார்.
மக்களின் ஜனநாயகத் தீர்ப்பை மதிப்பதாகவும், ரொறன்ரோ நகரத்தின் எதிர்கால முன்னேற்றத்திற்கு ஒலிவியா சௌ வெற்றிகரமாகச் செயற்பட வேண்டும் என விரும்புவதாகவும் அவர் குறிப்பிட்டார்.
2023ஆம் ஆண்டு நடைபெற்ற இடைத்தேர்தலில் முதன்முறையாக ரொறன்ரோ மாநகர முதல்வராகத் தெரிவான ஒலிவியா சௌ, தற்போது மீண்டும் வெற்றிபெற்றதன் மூலம் தனது முதலாவது முழுமையான நான்கு ஆண்டு பதவிக்காலத்தை ஆரம்பிக்கவுள்ளார்.
ரொறன்ரோ மக்களின் வாழ்க்கைச் செலவு, வீட்டுவசதி, பொதுப் போக்குவரத்து மற்றும் நகரப் பாதுகாப்பு உள்ளிட்ட முக்கிய பிரச்சினைகளுக்கு அவர் எவ்வாறு தீர்வு காணப்போகிறார் என்பது அடுத்த நான்கு ஆண்டுகளில் முக்கிய கவனத்தைப் பெறவுள்ளது.




