கனடாவின் அல்பெர்ட்டா மாகாணத்தில் உள்ள எட்மண்டன் நகருக்குக் கிழக்கே, பரபரப்பான நெடுஞ்சாலையின் நடுவே சிறிய ரக விமானம் ஒன்று அவசரமாகத் தரையிறக்கப்பட்ட சம்பவம் பரபரப்பை ஏற்படுத்தியுள்ளது.
ஸ்ட்ராத்கோனா கவுண்டியில் உள்ள நெடுஞ்சாலை 16 மற்றும் பேஸ்லைன் வீதிக்கு இடைப்பட்ட நெடுஞ்சாலை 21-ன் தெற்கு நோக்கிய பாதையில் ‘செஸ்னா 172’ ரக விமானம் திடீரென அவசரமாகத் தரையிறங்கியது.
விமானம் நெடுஞ்சாலையின் பாதையை மறித்து நின்றதால், மீட்புக் குழுவினர் அந்த இடத்தை முழுமையாகச் சீரமைக்கும் வரை காவல்துறையினர் போக்குவரத்தை மாற்றுப் பாதைகளில் திருப்பி விட்டனர்.
விமானம் தரையிறக்கப்பட்ட சமயத்தில் அதில் இருவர் இருந்ததாகவும், அதிர்ஷ்டவசமாக அவர்களுக்கு எவ்விதக் காயமும் ஏற்படவில்லை என்றும் அதிகாரிகள் உறுதிப்படுத்தியுள்ளனர்.
நெடுஞ்சாலையில் விமானம் அவசரமாகத் தரையிறக்கப்பட்டதற்கான காரணம் குறித்து ஆய்வு செய்ய கனடாவின் போக்குவரத்து பாதுகாப்பு வாரியத்திற்கு தகவல் தெரிவிக்கப்பட்டு விசாரணை தொடங்கப்பட்டுள்ளது.
செஸ்னா 172 ஸ்கைஹாக் என்பது பொதுவாக விமான ஓட்டுநர் பயிற்சி பெறும் மாணவர்களுக்குப் பயிற்சி அளிக்கப் பரவலாகப் பயன்படுத்தப்படும் ஒற்றை எஞ்சின் கொண்ட சிறிய ரக விமானமாகும்.
