கனடாவின் பிரிட்டிஷ் கொலம்பியா மாகாணத்திலுள்ள வேன்கூவர் தீவுக்கு மேற்கே கடலடியில் 5.6 அளவிலான நிலநடுக்கம் பதிவாகியுள்ளது.
ஞாயிற்றுக்கிழமை இரவு 11:41 மணியளவில் ஏற்பட்ட இந்த நிலநடுக்கம், வேன்கூவர் தீவின் வடக்கு முனையிலுள்ள போர்ட் ஹார்டி நகரத்திலிருந்து தென்மேற்கே சுமார் 219 கிலோமீட்டர் தொலைவில் மையம் கொண்டிருந்ததாக கனடா நிலநடுக்க ஆய்வு நிறுவனம் தெரிவித்துள்ளது.
கடற்பரப்பிற்குக் கீழே சுமார் 10 கிலோமீட்டர் ஆழத்தில் நிலநடுக்கம் ஏற்பட்டுள்ளது. எனினும், இதனால் பிரிட்டிஷ் கொலம்பியா உள்ளிட்ட மேற்குக் கடலோரப் பகுதிகளுக்குச் சுனாமி அபாயம் இல்லை என அதிகாரிகள் அறிவித்துள்ளனர்.
நிலநடுக்கத்தின் மையம் கேம்ப்பெல் ரிவர் நகரத்திலிருந்து சுமார் 300 கிலோமீட்டர் தொலைவிலும், போர்ட் ஆல்பர்னி நகரத்திலிருந்து சுமார் 330 கிலோமீட்டர் தொலைவிலும் அமைந்திருந்தது.
நிலநடுக்க மையத்திலிருந்து தென்கிழக்கே 450 கிலோமீட்டருக்கும் அதிகமான தொலைவில் அமைந்துள்ள மெட்ரோ வேன்கூவர் பகுதி வரையிலும் அதிர்வுகள் உணரப்பட்டதாகத் தெரிவிக்கப்பட்டுள்ளது. வேன்கூவர் தீவின் வடக்குப் பகுதிகளைச் சேர்ந்த சிலரும் நில அதிர்வுகளை உணர்ந்ததாகப் பதிவு செய்துள்ளனர்.
இந்த நிலநடுக்கத்தால் உயிரிழப்புகள், காயங்கள் அல்லது சொத்துச் சேதங்கள் ஏற்பட்டதாக உடனடியாகத் தகவல்கள் வெளியாகவில்லை.
Comments are closed, but trackbacks and pingbacks are open.