டொராண்டோ மேயர் தேர்தல் தொடர்பாக வெளியிடப்பட்டுள்ள புதிய கருத்துக்கணிப்பில், தற்போதைய மேயர் ஒலிவியா சௌ தொடர்ந்து முன்னிலை வகிப்பதாகத் தெரிவிக்கப்பட்டுள்ளது.
அதேவேளை, மேயர் தேர்தல் களத்தில் புதிதாக இணைந்துள்ள முன்னாள் மத்திய அமைச்சர் கிறிஸ் அலெக்ஸாண்டர், 10 சதவீத ஆதரவுடன் மூன்றாவது இடத்தைப் பிடித்துள்ளார்.
Liaison Strategies நிறுவனம் ஆகஸ்ட் 4 மற்றும் 5ஆம் திகதிகளில் 1,000 டொராண்டோ குடியிருப்பாளர்களிடம் மேற்கொண்ட கருத்துக்கணிப்பின் அடிப்படையில் இந்த முடிவுகள் வெளியிடப்பட்டுள்ளன.
முடிவு செய்துள்ள வாக்காளர்களிடையே மேற்கொள்ளப்பட்ட கணிப்பின்படி,
- ஒலிவியா சௌ – 47%
- பிராட் பிராட்போர்ட் – 40%
- கிறிஸ் அலெக்ஸாண்டர் – 10%
- ஏனைய வேட்பாளர்கள் – 3%
என ஆதரவு பதிவாகியுள்ளது.
கிறிஸ் அலெக்ஸாண்டர் தேர்தலில் போட்டியிடுவதாக அறிவிப்பதற்கு முன்னர் நடத்தப்பட்ட முந்தைய கருத்துக்கணிப்பில், “ஏனைய வேட்பாளர்கள்” பிரிவுக்கு சுமார் 10 சதவீத ஆதரவு காணப்பட்டிருந்தது.
தற்போது அந்த ஆதரவின் பெரும்பகுதி கிறிஸ் அலெக்ஸாண்டரை நோக்கி நகர்ந்துள்ளதாக Liaison Strategies தலைவர் டேவிட் வலன்டின் தெரிவித்துள்ளார்.
முடிவெடுக்காத வாக்காளர்களையும் உள்ளடக்கிய மொத்த கருத்துக்கணிப்பில், ஒலிவியா சௌவுக்கு 38 சதவீத ஆதரவும், பிராட் பிராட்போர்ட்டுக்கு 32 சதவீத ஆதரவும், கிறிஸ் அலெக்ஸாண்டருக்கு 8 சதவீத ஆதரவும் பதிவாகியுள்ளது.
இதற்கிடையில், சுமார் 20 சதவீத வாக்காளர்கள் இன்னும் யாருக்கு வாக்களிப்பது என்பது குறித்து முடிவெடுக்கவில்லை என கருத்துக்கணிப்பு தெரிவிக்கிறது.
இதனால், டொராண்டோ மேயர் தேர்தலின் இறுதி முடிவை தீர்மானிப்பதில் இந்த முடிவெடுக்காத வாக்காளர்களின் நிலைப்பாடு முக்கிய பங்கு வகிக்கக்கூடும் என எதிர்பார்க்கப்படுகிறது.
