கனடாவில் பல குற்ற வழக்குகளில் தொடர்புடைய கைதி தப்பியோட்டம்!

கனடாவின் டொராண்டோ மற்றும் அதனைச் சுற்றியுள்ள பகுதிகளில் தீவிரமாக நடமாடக்கூடிய ‘பிராட்லி எலியட்’ (42) என்ற குற்றவாளியைப் பிடிக்க, பொலிஸார் நாடு தழுவிய பிடியாணை பிறப்பித்து தீவிர தேடுதல் வேட்டையில் ஈடுபட்டுள்ளனர்.

தனது சட்டப்பூர்வ விடுதலையின் போது விதிக்கப்பட்ட நிபந்தனைகளை மீறித் தப்பியோடியுள்ள இவர், 42 வயதுடைய வெள்ளை இனத்தவர் ஆவார். இவர் 5 அடி 9 அங்குலம் உயரமும், 75 கிலோ எடையும், பழுப்பு நிறக் கூந்தலும், ஹேசல் நிறக் கண்களும் கொண்டவர். காவல்துறையின் தகவல்படி, இவரது உடலில் பல இடங்களில் அடையாளப் பச்சைகள் குத்தப்பட்டுள்ளன.

குறிப்பாக, இவரது வலது மேல் கையில் முள்வேலி, “HAWK” இதயம் மற்றும் சிலுவை அடையாளங்களும், இடது மேல் கையில் சிலுவை மற்றும் “Mom” என்ற வார்த்தையும் உள்ளன.

மேலும், வலது முன்கையில் “Crystal”, கழுத்தில் “Bush”, இடது கையில் பிறந்த திகதியுடன் கூடிய “Jayden”, இடது முன்கையில் “Nanette” மற்றும் முதுகின் நடுப்பகுதியில் “ELLIOTT” என்ற பெயர் மற்றும் இரண்டு கைப்பாக்கிகளின் படங்களும் பச்சை குத்தப்பட்டுள்ளன.

அடையாள மோசடி செய்து சொத்துக்களைக் கைப்பற்றுதல், குற்றங்கள் மூலம் பெறப்பட்ட சொத்துக்களை வைத்திருத்தல், அதிகாரிகளின் பணிக்கு இடையூறு செய்தல், அபாயகரமான முறையில் வாகனம் இயக்குதல், வாகனத் திருட்டு, அனுமதியின்றித் தடைசெய்யப்பட்ட ஆயுதங்களை வைத்திருத்தல், ஆயுதத்தால் தாக்குதல் மற்றும் காவலர் போல் ஆள்மாறாட்டம் செய்தல் உள்ளிட்ட பல வழக்குகளில் இவருக்கு 4 ஆண்டுகள் 1 மாதம் சிறைத்தண்டனை விதிக்கப்பட்டிருந்தது.

பொதுமக்கள் இவரைப் பற்றியோ அல்லது இவரது இருப்பிடம் குறித்தோ ஏதேனும் தகவல் தெரிந்தால் உடனடியாக 416-808-5900 அல்லது 1-866-870-7673 ஆகிய எண்களிலோ, ‘க்ரைம் ஸ்டாப்பர்ஸ்’ அமைப்பின் மூலமாகவோ காவல்துறைக்குத் தகவல் தெரிவிக்குமாறு கேட்டுக்கொள்ளப்படுகிறார்கள்.