கனடாவில் கல்வி கற்ற ஆயிரக்கணக்கான சர்வதேச மாணவர்கள், தாங்கள் தகுதியானவை என நம்பிய கல்வித் திட்டங்களை நிறைவு செய்த பின்னரும், பட்டப்படிப்புக்குப் பிந்தைய வேலை அனுமதிப் பத்திரமான PGWP நிராகரிக்கப்பட்டுள்ளதாக தெரிவித்து அதிருப்தி வெளியிட்டுள்ளனர்.
பாதிக்கப்பட்ட மாணவர்கள் அனைவரும் 2026 ஜூன் 24ஆம் திகதிக்கு முன்னரே தங்களது விண்ணப்பங்களை முழுமையாகச் சமர்ப்பித்திருந்ததாக கூறப்படுகிறது.
எனினும், அதே நாளில் கனடிய குடிவரவு, அகதிகள் மற்றும் குடியுரிமைத் திணைக்களம் தனது இணையதள வழிகாட்டுதலைப் புதுப்பித்து, கல்விக் கடன்கள் வழங்கப்படாத “Non-credit” கல்வித் திட்டங்களை முடித்தவர்களுக்கு பொதுவாக PGWP வழங்கப்படாது எனத் தெளிவுபடுத்தியது.
இதனால், ஏற்கனவே சமர்ப்பிக்கப்பட்ட விண்ணப்பங்களை பின்னர் வெளியிடப்பட்ட இணையதள விளக்கத்தின் அடிப்படையில் மதிப்பீடு செய்வது நியாயமற்றது என மாணவர்கள் வலியுறுத்துகின்றனர்.
இந்த விவகாரத்தால் பாதிக்கப்பட்ட முன்னாள் மாணவர்களைப் பிரதிநிதித்துவப்படுத்தும் Portage Students Union அமைப்பு, கனடா முழுவதும் சுமார் 1,500 பட்டதாரிகள் இதனால் பாதிக்கப்பட்டிருக்கலாம் என மதிப்பிட்டுள்ளது.
நிராகரிக்கப்பட்ட விண்ணப்பங்களை மீண்டும் திறந்து பரிசீலிக்க வேண்டும் என்றும், பாதிக்கப்பட்ட மாணவர்களுக்கு நியாயமான தீர்வு வழங்க அரசு அவசர நடவடிக்கை எடுக்க வேண்டும் என்றும் அந்த அமைப்பு கோரிக்கை விடுத்துள்ளது.
கால்கரியைச் சேர்ந்த குடிவரவு சட்டத்தரணி லோரா-அன் கோல்டிங், தனது அலுவலகத்தில் மட்டும் 200க்கும் மேற்பட்ட மாணவர்களின் வழக்குகள் தற்போது கையாளப்பட்டு வருவதாகத் தெரிவித்துள்ளார்.
பாதிக்கப்பட்ட மாணவர்கள் தங்களது விண்ணப்பங்கள் தொடர்பாக மறுபரிசீலனை கோர முடியும் என்றும், தேவையான சந்தர்ப்பங்களில் நீதிமன்றத்தில் நீதித்துறை மீளாய்வுக்கும் விண்ணப்பிக்கலாம் என்றும் அவர் குறிப்பிட்டுள்ளார்.
இதற்கிடையில், PGWP வழங்குவதற்கான தகுதி விதிகளில் எந்தவித மாற்றமும் மேற்கொள்ளப்படவில்லை என கனடிய குடிவரவு, அகதிகள் மற்றும் குடியுரிமைத் திணைக்களம் தெரிவித்துள்ளது.
ஜூன் மாதத்தில் மேற்கொள்ளப்பட்ட இணையதளப் புதுப்பிப்பு, ஏற்கனவே நடைமுறையில் இருந்த விதிமுறைகளை மேலும் தெளிவுபடுத்துவதற்காக மட்டுமே வெளியிடப்பட்டதாகவும் திணைக்களம் விளக்கமளித்துள்ளது.
எனினும், இந்த விளக்கம் பாதிக்கப்பட்ட மாணவர்களின் அதிருப்தியைத் தணிக்கவில்லை. கனடாவில் கல்வி, வேலை மற்றும் எதிர்கால வாழ்க்கையை அமைத்துக்கொள்ளத் திட்டமிட்டிருந்த ஆயிரக்கணக்கான சர்வதேச மாணவர்கள், தங்களுக்கு நியாயமான தீர்வு கிடைக்கும் என்ற எதிர்பார்ப்புடன் அரசின் அடுத்த நடவடிக்கையை எதிர்நோக்கி வருகின்றனர்.
