கனடாவின் பிரிட்டிஷ் கொலம்பியா மாகாணத்தில் மிகவும் சவாலான மலைப்பாதையில் சிக்கிய மூன்று மலையேற்றப் பயணிகள், லயன்ஸ் பே தேடுதல் மற்றும் மீட்புக் குழுவினரால் பாதுகாப்பாக மீட்கப்பட்டுள்ளனர்.
குறித்த மூவரும் சைப்பிரஸ் மவுண்டனிலிருந்து காலை 8.30 மணியளவில் பயணத்தை ஆரம்பித்து, ஹவ் சவுண்ட் கிரெஸ்ட் பாதை வழியாக லயன்ஸ் பே பகுதியை அடையத் திட்டமிட்டிருந்தனர்.
எனினும், மவுண்ட் அன்நெசெசரி பகுதியை அடைந்தபோதே அவர்கள் நீரிழப்பு மற்றும் கடுமையான தசைப்பிடிப்பால் பாதிக்கப்பட்டதாக மீட்புக் குழு தெரிவித்துள்ளது. தொடர்ந்து பயணித்தபோது, பாறைகள் நிறைந்த இறக்கத்தில் ஒருவர் சுமார் மூன்று மீட்டர் உயரத்திலிருந்து விழுந்து முதுகின் கீழ்ப்பகுதியில் காயமடைந்ததால் அவரால் பயணத்தைத் தொடர முடியவில்லை.
இருள் சூழ்ந்ததுடன், செங்குத்தான நிலப்பரப்பு மற்றும் காயமடைந்த நபரின் நிலைமை காரணமாக, நார்த் ஷோர் மீட்புக் குழு மற்றும் டலோன் ஹெலிகாப்டர்ஸ் நிறுவனத்தின் உதவி கோரப்பட்டது. நள்ளிரவு 12.45 மணியளவில் காயமடைந்தவர் ஹெலிகாப்டர் மூலம் மீட்கப்பட்டார். சோர்வடைந்து, போதிய பொருட்கள் இல்லாமல் இருந்த ஏனைய இருவரும் பாதுகாப்புக் கருதி மலைப்பகுதியிலிருந்து வெளியேற்றப்பட்டனர்.
கூகுள் மேப்ஸ் காட்டிய தவறான பயண நேரம்
இந்தச் சம்பவத்தைத் தொடர்ந்து, மலை மற்றும் காட்டுப் பாதைகளுக்கான பயணங்களைத் திட்டமிடும்போது கூகுள் மேப்ஸை மட்டும் நம்ப வேண்டாம் என லயன்ஸ் பே தேடுதல் மற்றும் மீட்புக் குழு எச்சரித்துள்ளது.
பயணிகள் கூகுள் மேப்ஸ் வழங்கிய வழிகாட்டுதலை அச்சிட்டு எடுத்துச் சென்றிருந்ததாகவும் மீட்புக் குழு தெரிவித்துள்ளது. சைப்பிரஸ் மவுண்டனிலிருந்து வெஸ்ட் லயன் பகுதிக்குச் செல்ல 2 மணி 55 நிமிடங்களும், அங்கிருந்து லயன்ஸ் பே பகுதிக்குச் செல்ல 2 மணி 18 நிமிடங்களும் என மொத்தம் 5 மணி 13 நிமிடங்கள் மட்டுமே தேவைப்படும் என்று கூகுள் மேப்ஸ் மதிப்பிட்டிருந்தது.
ஆனால் ஏறத்தாழ 18 கிலோமீட்டர் நீளமுடைய குறித்த பாதையில் 1,300 மீட்டருக்கும் அதிகமான உயர ஏற்றம், பாறைகள் நிறைந்த பகுதிகள், செங்குத்தான ஏற்ற இறக்கங்கள், வழித்தடம் கண்டறிதல் மற்றும் கைகளையும் பயன்படுத்தி ஏற வேண்டிய சவாலான பகுதிகள் காணப்படுகின்றன.
இந்தப் பயணத்தைப் பாதுகாப்பாக முடிப்பதற்கு உண்மையில் 12 முதல் 14 மணி நேரம் வரை தேவைப்படலாம் என மீட்புக் குழு தெரிவித்துள்ளது. தவறான பயண நேரத்தை நம்புவதால் தாமதமாகப் பயணத்தை ஆரம்பித்தல், போதுமான உணவு மற்றும் தண்ணீர் எடுத்துச் செல்லாமை, இருள் சூழ்வதற்கு முன்னர் பாதையை முடிக்க முடியாமை போன்ற ஆபத்துகள் ஏற்படலாம் என்றும் எச்சரிக்கப்பட்டுள்ளது.
மலைப்பயணங்களுக்கு AllTrails, Granite, Gaia GPS அல்லது Avenza Maps போன்ற நிலவியல் மற்றும் மலைப்பாதைகளுக்காக வடிவமைக்கப்பட்ட செயலிகளைப் பயன்படுத்துமாறும், வானிலை, பாதையின் உயர ஏற்றம், அண்மைய பாதை நிலைமைகள் மற்றும் அவசரகாலத் தேவைகளை முன்கூட்டியே சரிபார்க்குமாறும் பொதுமக்களுக்கு அறிவுறுத்தப்பட்டுள்ளது.
Comments are closed, but trackbacks and pingbacks are open.