Bradford பகுதியில் வெள்ளிக்கிழமை மாலை இடம்பெற்ற வாகன விபத்தில் Barrie பகுதியைச் சேர்ந்த பெண் ஒருவரும், அவரது மகனும் ஒன்பது வயதாக பேரனும் உயிரிழந்துவிட்டதாக காவல்துறையினர் தெரிவித்துள்ளனர்.
இரண்டு வாகனங்கள் ஒன்றுடன் ஒன்று நேருக்கு நேர் மோதுண்ட இந்த விபத்து, 14th Lineற்கு தெற்கே, Yonge Street பகுதியில் வெள்ளிக்கிழமை மாலை 4:30 அளவில் சம்பவித்துள்ளது.
தகவல் அறிந்து தாம் சம்பவ இடத்தினைச் சென்றடைந்த வேளையில், அந்த வீதியில் வடக்கு நோக்கி பயணித்துக் கொண்டிருந்த SUV ரக வாகனம் ஒன்று, தெற்கு நோக்கி பயணித்துக் கொண்டிருந்த கனரக சரக்கு ஊர்தி ஒன்றுடன் மோதுண்ட நிலையில் காணப்பட்டதாக காவல்துறையினர் தெரிவித்துள்ளனர்.
Barrieஐச் சேர்நத 61 வயதுப் பெண்ணும், அவரது மகனான Newmarketஐச் சேர்ந்த 37 வயது ஆணும் சம்பவ இடத்திலேயே உயிரிழந்து விட்ட நிலையில், ஒன்பது வயதுச் சிறுவன் மருத்துவமனைக்கு கொண்டுசெல்லப்பட்ட நிலையில் உயிரிழந்துள்ளார்.
உயிரிழந்தவர்களது பெயர்கள் எவையும் அதிகாரிகளால் உடனடியாக வெளியிடப்படவில்லை.
இந்தச் சம்பவம் தொடர்பில் மேலதிக விபரம் அறிந்தோர் தம்மை 905-775-3311 என்ற இலக்கத்தில் தொடர்பு கொள்ளுமாறு காவல்துறையினர் வேண்டுகோள் விடுத்துள்ளனர்.
