கனடாவின் மத்திய அரசு கொண்டு வந்துள்ள புதிய குடியேற்றக் கட்டுப்பாடுகளின் தாக்கம் நாட்டின் சனத்தொகை வளர்ச்சியில் தெளிவாகப் பிரதிபலிக்கத் தொடங்கியுள்ளது.
கனடிய புள்ளிவிபரவியல் திணைக்களத்தின் சமீபத்திய தரவுகளின்படி, 2026 ஏப்ரல் 1ஆம் திகதியளவில் கனடாவின் மொத்த சனத்தொகை 41,417,056 ஆக மதிப்பிடப்பட்டுள்ளது. இது 2026 ஜனவரி 1ஆம் திகதியுடன் ஒப்பிடும்போது 55,025 பேர் குறைவு எனக் கூறப்பட்டுள்ளது. இந்த வீழ்ச்சி 2026ஆம் ஆண்டின் முதல் காலாண்டில் மட்டும் பதிவாகியுள்ளது.
இந்த சனத்தொகை வீழ்ச்சிக்கு முக்கிய காரணமாக, நாட்டில் உள்ள நிரந்தரமற்ற குடியிருப்பாளர்களின் எண்ணிக்கை குறைவு சுட்டிக்காட்டப்பட்டுள்ளது. சர்வதேச மாணவர்கள், தற்காலிக வேலை அனுமதி பெற்றவர்கள் மற்றும் தஞ்சம் கோருபவர்கள் ஆகியோரின் எண்ணிக்கையில் ஏற்பட்ட கட்டுப்பாடுகள் இதற்கு காரணமாக உள்ளன.
2026ஆம் ஆண்டின் முதல் காலாண்டில் கனடா 83,149 நிரந்தர குடியேறிகளை வரவேற்றுள்ளது. இது 2025ஆம் ஆண்டின் இதே காலாண்டில் வரவேற்கப்பட்ட 104,210 பேருடன் ஒப்பிடும்போது 20.2 சதவீதக் குறைவு ஆகும்.
அதேவேளை, 2026 முதல் மூன்று மாதங்களில் கனடாவில் நிரந்தரமற்ற குடியிருப்பாளர்களின் எண்ணிக்கை 117,879 பேரால் குறைந்துள்ளது என்றும் அறிக்கைகள் தெரிவிக்கின்றன.
இந்த மாற்றம் மாகாணங்களின் பொருளாதாரம், வேலைவாய்ப்பு சந்தை, கல்வி நிறுவனங்கள், சுகாதார சேவைகள் மற்றும் குடியிருப்பு சந்தை போன்ற துறைகளில் தாக்கத்தை ஏற்படுத்தக்கூடும் என பொருளாதார நிபுணர்கள் எச்சரிக்கின்றனர்.
பிரின்ஸ் எட்வர்ட் தீவு மாகாணத்திலும் இதன் தாக்கம் தென்படுகிறது. 2026 ஏப்ரல் 1ஆம் திகதியளவில் PEI மாகாணத்தின் சனத்தொகை 181,715 ஆக இருந்தது. 2026ஆம் ஆண்டின் முதல் காலாண்டில் மட்டும் அந்த மாகாணத்தின் சனத்தொகை 286 பேரால், அதாவது 0.2 சதவீதம் குறைந்துள்ளது.
மேலும், PEI மாகாணத்தில் கடந்த சில காலாண்டுகளாக சனத்தொகை தொடர்ந்து குறைந்து வருவதாகவும், பிறப்புகளை விட இறப்புகள் அதிகமாக பதிவாகி வருவதாகவும் மாகாணத் தகவல்கள் தெரிவிக்கின்றன.
குடியேற்றக் கட்டுப்பாடுகள் வீட்டு வசதி மற்றும் பொதுச் சேவைகளின் அழுத்தத்தை குறைக்கும் நோக்கத்துடன் அமல்படுத்தப்பட்டாலும், அதே நேரத்தில் குறைந்த சனத்தொகை வளர்ச்சி மாகாணங்களின் பொருளாதார வளர்ச்சியையும் தொழிலாளர் பற்றாக்குறையையும் பாதிக்கக்கூடும் என்ற கவலை அதிகரித்து வருகிறது.
