வித்துவான் வேந்தனாரின் நூற்றாண்டுவிழாவும் நூல்கள் வெளியீடு!

அன்பிற்குரிய கனடிய தமிழ் அன்பர்கள், வேலணையூரவர்கள், புங்குடுதீவு ஊரவர்கள், வேலணை மத்திய கல்லூரி பழைய மாணவர் சங்கம் – கனடா உறுப்பினர்கள், வேலணை மக்கள் ஒன்றியம்- கனடா உறுப்பினர்கள், வேலணை சைவப் பிரகாச வித்தியாசாலை, வேலணை சரசுவதி வித்தியாசாலை பழைய மாணவர்கள் , புங்குடுதீவு நலன்புரிச் சங்கம்- கனடா உறுப்பினர்கள், யாழ் இந்து பழைய மாணவர் சங்கம்-கனடா உறுப்பினர்கள், கனடிய தமிழ்ப் பாடசாலை ஆசிரியர்கள்- மாணவர்கள்- பெற்றோர்கள், மற்றும் கனடிய தமிழ் இலக்கிய அமைப்புகளின் உறுப்பினர்கள்- கனடிய தமிழ் ஊடகவியலாளர்கள், தமிழ் ஆர்வலர்கள்- தமிழ் உணர்வாளர்கள்
ஆகிய அனைத்துத் தமிழ் உறவுகளே

எனதருமைத் தந்தையும், ஈழத் தமிழ்ப் பேரறிஞருமான தமிழ்ப்பேரன்பர் வித்துவான் க வேந்தனார் அவர்களின் நூற்றாண்டு விழாவையும், அதையொட்டிய ஆறு நூல்கள், மூன்று குறுந்தகடுகள் வெளியீட்டு விழாவையும், வரும் 27.07.2019 சனிக்கிழமை, கனடா – ரொரன்றோவிலுள்ள அய்யப்பன் கோயில் மண்டபத்தில்( Iyappan Temple Hall, 635 Middlefield Road, Scarbirough, Ontario, M1V 5B8) , கனடாவிலுள்ள எனது தாய் மாமன்மாரின் பிள்ளைகள், வேலணை ஊரவர்கள் , புங்குடுதீவு ஊரவர்கள், எனது யாழ் இந்து நண்பர்கள் அவர்களின் ஆதரவுடன் கொண்டாடவுள்ளேன்.

இவ் விழாவிற்கு நீங்கள் உங்கள் உறவுகளுடன் குடும்பமாக வந்து, கலந்து கொண்டு சிறப்பிக்க வேண்டுமென , வேந்தனாரின் தமிழ் உணர்வின் பேரால், அன்போடும் , உரிமையோடும் அழைப்பு விடுகின்றேன்.

இத்துடன் இந்த விழாவிற்கான அழைப்பிதழை இணைத்துள்ளேன்.

இதனை நீங்கள் உங்கள் நண்பர்களுடன்- தமிழ் அறிஞர்களுடன் பகிர்ந்து கொள்ளும்படி , பணிவோடு கேட்டுக் கொள்கின்றேன்.

இலண்டனில் இந் நூற்றாண்டு விழாவை கடந்த சித்திரை மாத இறுதியில் கொண்டாடிய போது, வெளியிடப்படுகின்ற ஆறு நூல்கள்- மூன்று குறுந்தகடுகள் பற்றிய விளக்கத்தை, 19 நிமிடக் காணொளியாக, இலண்டன் தமிழ் உறவுகளுடன் பகிர்ந்து கொண்டேன். அதனை இன்று உங்களுடனும், வெளியிடும் வெளியீடுகளின் விளக்கம் கருதி இணைத்துள்ளேன். திகதி – இடம் போன்ற விபரங்களை நீங்கள் கவனிக்க வேண்டாம்.

இச் செய்தியின் தொடக்கத்திலும் , அழைப்பிதழிலும் , கனடா – ரொரன்றோ நிகழ்வின் விபரங்கள் தெளிவாகக் கொடுக்கப் பட்டுள்ளன.

இந்த விழாவிற்கான அழைப்பை, கவி வடிவில் , என் குரலோசையிலும், பதிய விட்டுள்ளேன்.

மீண்டும் உங்கள் அனைவரையும் 27.07.2019 நடக்கவிருக்கும் வித்துவான் வேந்தனார் நூற்றாண்டு விழா- நூல்கள் வெளியீட்டு விழாவிற்கு, மாலை 4.45 மணிக்குப் பிந்தாமல் வந்து, நிகழ்வுகள் சரியாக 5 மணிக்குத் தொடங்க ஒத்துழைக்கும்படி, அன்புடனும் , பணிவுடனும் வேண்டிக் கொள்கின்றேன்.

” வில்லிற்கு வீரன் யாரெனில் விஜயனாகும்
விறல் தமிழ் சொல்லிற்கு வேந்தன் யார்? வேந்தனார்.

நன்றி.
அன்புடன்
வேந்தனார் இளஞ்சேய்
இலண்டன்