டொராண்டோவைச் சேர்ந்த கனடியத் தம்பதியினரின் மகிழ்ச்சியான விடுமுறைப் பயணம், போதைப்பொருள் கடத்தல் குற்றச்சாட்டு, சிறைவாசம் மற்றும் கருச்சிதைவு எனப் பெரும் சோகத்தில் முடிந்துள்ளது.
டொராண்டோவில் வசிக்கும் கிறிஸ்டியன் மற்றும் ஆட்ரியானா ஜோனி (Kristian and Adriana Gjoni) தம்பதியினர், தங்களது முதல் குழந்தையை எதிர்பார்த்திருக்கும் மகிழ்ச்சியான செய்தியை உறவினர்களுடன் பகிர்ந்துகொள்வதற்காக கடந்த கோடைக்காலத்தில் அல்பேனியாவுக்குப் பயணம் மேற்கொண்டனர்.
ஆனால், திரானா விமான நிலையத்தில் தரையிறங்கியதும் அவர்களது வாழ்க்கையே தலைகீழாக மாறியது.
தம்பதியினர் கொண்டுவந்த நான்கு பயணப் பொதிகளில் ஒன்றின் அடையாள அட்டை (Baggage Tag) காணாமல் போயிருந்ததாக சுங்கத்துறை அதிகாரிகள் தெரிவித்துள்ளனர்.
சுமார் இரண்டரை மணிநேர விசாரணைக்குப் பின்னர், பொதிகள் வரும் பெல்ட்டில் இருந்த மற்றொரு பயணப் பையை எடுக்குமாறு கிறிஸ்டியனிடம் அதிகாரிகள் கூறியுள்ளனர்.
அந்தப் பை தன்னுடையது அல்ல என்று அவர் பலமுறை தெரிவித்தபோதிலும், அதிகாரிகள் அதனைத் திறந்து சோதனையிட்டுள்ளனர். அதற்குள் 23.15 கிலோகிராம் கஞ்சா இருந்தது கண்டுபிடிக்கப்பட்டது.
இதனையடுத்து கிறிஸ்டியன் கைது செய்யப்பட்டு, ஜன்னல்கள் இல்லாத சிறிய தனிமைச் சிறை அறையில் நான்கு நாட்கள் அடைக்கப்பட்டதாகத் தெரிவிக்கப்படுகிறது.
கனடா அரசின் அறிவுறுத்தலே சந்தேகத்தை ஏற்படுத்தியது!
விமான நிலையங்களில் போதைப்பொருள் கடத்தல் கும்பல்கள் பயணிகளின் பொதிகளில் உள்ள அடையாள அட்டைகளை மாற்றி, போதைப்பொருள் நிரப்பப்பட்ட பைகளில் ஒட்டும் மோசடி குறித்து கனடா அரசு ஏற்கனவே எச்சரிக்கை விடுத்திருந்தது.
இதனால் பயணிகள் தங்கள் பொதிகளையும் அவற்றின் அடையாள அட்டைகளையும் புகைப்படம் எடுத்து வைத்துக்கொள்ளுமாறு அறிவுறுத்தப்பட்டிருந்தனர்.
அதன்படி கிறிஸ்டியனும் தனது பயணப் பொதிகளைப் புகைப்படம் எடுத்து வைத்திருந்தார்.
ஆனால், அந்தப் புகைப்படங்களை ஆதாரமாக ஏற்றுக்கொள்வதற்குப் பதிலாக, அவற்றை எடுத்ததே சந்தேகத்திற்குரிய செயலாக அல்பேனிய அதிகாரிகள் கருதியதாக அவர் தெரிவித்துள்ளார்.
கர்ப்பிணி மனைவிக்கு ஏற்பட்ட பெரும் சோகம்!
இதற்கிடையில், கர்ப்பிணியாக இருந்த ஆட்ரியானாவுக்கு கடுமையான வயிற்றுவலி ஏற்பட்டதால் மருத்துவமனைக்கு அழைத்துச் செல்லப்பட்டார்.
முதலில் மேற்கொள்ளப்பட்ட மருத்துவப் பரிசோதனையில் அவர் கர்ப்பமாக இல்லை என்று தவறாகத் தெரிவிக்கப்பட்டுள்ளது.
இதனால் தம்பதியினர் கர்ப்பம் தொடர்பாகப் பொய்யான தகவல்களை வழங்கியதாக அல்பேனிய ஊடகங்களில் செய்திகள் வெளியாகின.
பின்னர் மற்றொரு மருத்துவமனையில் மேற்கொள்ளப்பட்ட ரத்தப் பரிசோதனையில் அவர் கர்ப்பமாக இருந்தது உறுதிப்படுத்தப்பட்டது. எனினும், ஆட்ரியானாவுக்கு கருச்சிதைவு ஏற்பட்டது.
இந்தத் துயரச் சம்பவத்திற்கு தாங்கள் எதிர்கொண்ட மன உளைச்சலும் கடுமையான அனுபவங்களுமே காரணமாக இருக்கலாம் என்று கிறிஸ்டியன் கருதுகிறார்.
கர்ப்பம் மற்றும் கருச்சிதைவு தொடர்பான மருத்துவ ஆவணங்களைப் பார்வையிட்டு உறுதிப்படுத்தியுள்ளதாக CTV-யின் W5 புலனாய்வுச் செய்தி நிகழ்ச்சி தெரிவித்துள்ளது.
கனடிய காவல்துறை வழங்கிய முக்கிய ஆதாரம்!
கனடிய அரச காவல்துறையான RCMP மேற்கொண்ட விசாரணையில், தம்பதியினர் டொராண்டோ விமான நிலையத்தில் தங்களுக்குச் சொந்தமான நான்கு பொதிகளை மட்டுமே ஒப்படைத்திருந்தது உறுதிப்படுத்தப்பட்டுள்ளது.
கிறிஸ்டியன் பயணப் பொதிகளின் அடையாள அட்டைகளை மாற்றும் மோசடிக்குப் பலியாகியிருக்கலாம் என்றும் கனடிய காவல்துறை தெரிவித்துள்ளதாக W5 செய்தி வெளியிட்டுள்ளது.
இதனைத் தொடர்ந்து பிணையில் விடுவிக்கப்பட்ட கிறிஸ்டியன் தற்போது டொராண்டோ திரும்பியுள்ளார்.
இருப்பினும், நான்கு மாதங்களுக்கு ஒருமுறை அல்பேனியாவுக்குச் சென்று அந்நாட்டு காவல்துறையிடம் ஆஜராக வேண்டிய கட்டுப்பாடு அவருக்கு விதிக்கப்பட்டுள்ளது.
15 ஆண்டுகள் சிறைத்தண்டனை விதிக்கப்படும் அபாயம்!
இந்த வழக்கு 2027ஆம் ஆண்டின் தொடக்கத்தில் விசாரணைக்கு வருமென எதிர்பார்க்கப்படுகிறது.
குற்றச்சாட்டு நீதிமன்றத்தில் நிரூபிக்கப்பட்டால் கிறிஸ்டியனுக்கு அதிகபட்சமாக 15 ஆண்டுகள் வரை சிறைத்தண்டனை விதிக்கப்படும் அபாயம் உள்ளது.
இதுவரை அவர் மீதான குற்றச்சாட்டு நீதிமன்றத்தில் நிரூபிக்கப்படவில்லை.
இந்தச் சம்பவம், வெளிநாடுகளுக்குப் பயணம் மேற்கொள்ளும் கனடியர்கள் தங்கள் பயணப் பொதிகளையும் அடையாள அட்டைகளையும் கவனமாகச் சரிபார்க்க வேண்டியதன் அவசியத்தை மீண்டும் எடுத்துக்காட்டியுள்ளது.
ஆதாரம்: CTV News – W5 / Travel Market Report
Comments are closed, but trackbacks and pingbacks are open.