கனடாவின் அல்பேர்ட்டா மாகாணத்தில் உள்ள வைன்ரைட் (Wainwright) ராணுவ முகாமில் ஏற்பட்ட தீ விபத்தில் பாதிக்கப்பட்ட ராணுவ வீரர்கள் மற்றும் அவர்களது குடும்பங்களுக்கு உதவும் நோக்கில், 14 வயதுடைய சிறுவன் ஒருவர் 200 கிலோமீட்டர் நிதி திரட்டும் நடைபயணத்தை மேற்கொண்டு வருகிறார்.
எட்மண்டன் நகரைச் சேர்ந்த லியாம் ஹெர்மன் (Liam Herman) என்ற சிறுவனே இந்த நெகிழ்ச்சியான முயற்சியில் ஈடுபட்டுள்ளார்.
ஞாயிற்றுக்கிழமை (நவம்பர் 1) அதிகாலை 3 மணியளவில், கடும் குளிரையும் பொருட்படுத்தாமல் தனது நடைபயணத்தை அவர் தொடங்கியுள்ளார்.
“கடுமையான குளிரால் எனது கால் விரல்கள் உறையும் அளவுக்கு இருக்கிறது. இருப்பினும், எனது இலக்கில் நான் உறுதியாக இருக்கிறேன்” என்று லியாம் தெரிவித்துள்ளார்.
வைன்ரைட் ராணுவ முகாமில் ஏற்பட்ட தீ விபத்து குறித்து அறிந்தபோது மிகுந்த மனவேதனை அடைந்ததாகவும், அதில் பாதிக்கப்பட்ட ராணுவ வீரர்கள் மற்றும் அவர்களது குடும்பங்களுக்கு ஏதாவது உதவி செய்ய வேண்டும் என்ற எண்ணத்திலேயே இந்த முயற்சியைத் தொடங்கியதாகவும் அவர் கூறியுள்ளார்.
“பாதிக்கப்பட்ட குடும்பங்களுக்காகவும், மருத்துவமனையில் சிகிச்சை பெற்று வருபவர்களுக்காகவும் மிகவும் வருந்துகிறேன். அவர்கள் அனைவரும் விரைவில் குணமடைந்து இயல்பு வாழ்க்கைக்குத் திரும்ப வேண்டும் என்று பிரார்த்திக்கிறேன்” எனவும் லியாம் தெரிவித்துள்ளார்.
பாதிக்கப்பட்டவர்களுக்கு உதவுவதற்காக மொத்தம் 200 கிலோமீட்டர் தூரம் நடப்பதை இலக்காகக் கொண்டுள்ள அவர், இதன்மூலம் 7,000 கனடிய டொலர்களை நிதியாகத் திரட்டவும் திட்டமிட்டுள்ளார்.
இதற்காக ராணுவ வீரர்கள் மற்றும் அவர்களது குடும்பங்களுக்கு உதவி வழங்கும் ‘Support Our Troops’ என்ற தொண்டு அமைப்புடன் இணைந்து அவர் செயற்பட்டு வருகிறார்.
தனது நடைபயணம் குறித்து விளக்கிய லியாம், “எனக்கென குறிப்பிட்ட பாதை எதுவும் இல்லை. நிர்ணயித்த இலக்கை அடையும் வரை தொடர்ந்து நடப்பேன். முதல் நாளில் 80 முதல் 100 கிலோமீட்டர் வரை நடக்கவும், அதன் பின்னர் புதன்கிழமை வரை தினமும் 32.5 கிலோமீட்டர் தூரம் நடக்கவும் திட்டமிட்டுள்ளேன்” என்று கூறியுள்ளார்.
ஞாயிற்றுக்கிழமை பிற்பகல் நிலவரப்படி, அவரது முயற்சிக்கு 700 கனடிய டொலர்களுக்கும் அதிகமான நிதி திரட்டப்பட்டுள்ளதாகத் தெரிவிக்கப்பட்டுள்ளது.
தனது வயதையும் கடும் குளிரையும் பொருட்படுத்தாமல், பாதிக்கப்பட்ட ராணுவ வீரர்களின் குடும்பங்களுக்கு உதவ முன்வந்துள்ள இந்தச் சிறுவனின் மனிதநேயச் செயல் பலரது பாராட்டையும் பெற்றுள்ளது.
Comments are closed, but trackbacks and pingbacks are open.