நேற்று ஞாயிற்றுக்கிழமை ஹமில்ட்டனில் வீடு ஒன்றில் தீப்பரவல் ஏற்பட்ட நிலையில், தனது வீட்டில் ஏற்பட்ட அந்தத் தீயை அணைக்க முயன்ற சுமார் 60 வயது மதிக்கத்தக்க ஆண் ஒருவர், படுகாயமடைந்த நிலையில் தற்போது மருத்துவமனையில் உயிருக்குப் போராடி வருகிறார்.
Hamilton Mountainஇல், East 44th Streetஇல் உள்ள இருண்டு மாடி வீடு ஒன்றில் நேற்று பிற்பகல் 12:45 அளவில் இந்தச் சம்பவம் இடம்பெற்றுள்ளது.
தகவலறிந்து தாம் சம்பவ இடத்தினைச் சென்றடைந்த போது, வீட்டின் கீழ்த்தள யனன்ல் ஊடாக புகை வெளியேறியவாறு காணப்பட்டதாக தீயணைப்புப் படையினர் தெரிவித்துள்ளனர்.
தீயணைப்புப் படையினர் அங்கே சென்றபோது அந்த வீட்டில் இருந்தோர் அனைவரும் வீட்டுக்கு வெளியே இருந்ததாகவும், எனினும் வீட்டுக்கு மிக அருகே நின்றுகொண்டிருந்த வீட்டின் உரிமையாளர் சிறிது நேரத்தில் மயங்கி வீழ்ந்ததாகவும் தெரிவிக்கப்படுகிறது.
அந்த வீட்டில் தீ ஏற்பட்ட போது குறித்த இந்த நபர் அதனை அணைப்பதற்கு முயன்றமை பின்னர் மேற்கொள்ளப்பட்ட விசாரணைகளில் தெரியவந்துள்ளது.
சம்பவ இடத்துக்கு விரைந்த அவசர மருத்துவப் பிரிவினர் குறித்த அந்த நபருக்குத் தேவையான உயிர்காப்பு முதலுதவிகளை வழங்கி, பின்னர் அவரை மருத்துவமனையில் அனுமதித்துள்ளனர். மருத்துவமனையில் அவர் கோமா நிலையில் தீவிர கண்காணிப்புப் பிரிவில் வைக்கப்பட்டுள்ளதாக பிந்திக் கிடைத்த தகவல்கள் தெரிவிக்கின்றன.
இதேவேளை இவ்வாறு உங்கள் வீடுகளிலேயோ அல்லது எங்காவது இப்படி தீப்பரல் ஏற்படுவதை அறிந்தால், உடனடியாக அங்கிருந்து வெளியேறி 911 என்ற இலக்கத்திற்கு அழைக்குமாறும், நீங்களாகவே தீயை அணைக்க முயலவேண்டாம் என்றும் பொதுமக்களுக்கு அதிகாரிகள் அறிவுறுத்தல் விடுத்துள்ளனர்.
