நேற்று இரவு ஸ்காபரோவில் உள்ள வீடு ஒன்றின் மீது கார் ஒன்று மோதி வீட்டின் சுவரில் பாரிய துளையினை ஏற்படுத்தியுள்ள நிலையில், இந்தச் சம்பவம் தொடர்பில் காவல்துறையினர் விசாரணைகளை முன்னெடுத்து வருகின்றனர்.
மோதுண்ட வாகனத்தை செலுத்திய 17 வயது தமிழ் இளையர் காயங்கள் இன்றி தப்பினார்.
Steeles Avenue மற்றும் Staines வீதிப் பகுதியில், நேற்று இரவு 7.30 அளவில் இந்தச் சம்பவம் இடம்பெற்றுள்ளது.
இந்த விபத்தின் போது வீட்டின் சுவரில் சேதம் ஏற்பட்டுள்ள போதிலும், வீட்டுக்கான எரிவாயு இணைப்புக் குழாய்கள் எவையும் பாதிக்கப்படவில்லை என்பதனை ரொரன்ரோ தீயணைப்பு படையினர் உறுதிப்படுத்தியுள்ளனர். எனினும் வீட்டின் கட்டுமானத்தில் ஏற்பட்பட்டுள்ள சேதம் மற்றும் அதனால் ஏற்படக்கூடிய பாதிப்புகளைக் கண்டறிவதற்கு கட்டிட ஆய்வாளர்கள் சம்பவ இடத்திற்கு அழைக்கப்பட்டிருந்தனர்.
சம்பவ இடத்தில் நீல நிற வாகனம் ஒன்று அதன் முன் பகுதியில் சேதங்களுடன் நிற்பதையும், குறித்த அந்த வீட்டின் சுவரில் பாரிய துளை ஒன்று ஏற்பட்டுள்ளதனையும் காணக்கூடியதாக உள்ளது.
இந்த விபத்துடன் தொடர்புடைய வாகனத்தின் சாரதி சம்பவ இடத்திலேயே இருந்ததாகவும், இதன்போது எவருக்கும் காயங்கள ஏற்படவில்லை என்றும் தெரிவித்துள்ள காவல்துறையினர், இந்தச் சம்பவம் தொடர்பில் மேலதிக தகவல் அறிந்தோர் தம்மைத் தொடர்பு கொள்ளுமாறு வேண்டுகோள் விடுத்துள்ளனர்.
