மிசிசாகாவில் இன்று இரவு இடம்பெற்ற துப்பாக்கிச் சூட்டுச் சம்பவத்தில் ஒருவர் பலியானதுடன், மேலும் ஐந்து பேர் காயமடைந்த நிலையில் மருத்துவமனையில் அனுமதிக்கப்பட்டுள்ளதாக பீல் பிராந்திய காவல்துறையினர் தெரிவித்துள்ளனர்.
Morning Star drive மற்றும் Goreway drive பகுதியில், Darcel Avenueவில் அமைந்துள்ள அடுக்குமாடிக் குடியிருப்பு ஒன்றிற்கு வெளியே, இரவு 6:30 அளவில் இந்தத் துப்பாக்கிச் சூட்டுச் சம்பவம் இடம்பெற்றுள்ளது.
இந்தச் சம்பவத்தின் போது ஒருவர் சம்பவ இடத்திலேயே உயிரிழந்து விட்டதாகவும், பெண் ஒருவர் உயிராபத்தான நிலையில் தீவிர சிகிச்சைப் பிரிவில் அனுமதிக்கப்பட்டுள்ளதாகவும், மேலும் ஒரு பதின்மவயது ஆணும் பெண்ணும் பலத்த காயங்களுடன் அவசர மருத்துவப் பிரிவில் அனுமதிக்கப்பட்டதாகவும், மேலும் ஒரு ஆண் சிறிய காயங்களுடன் உள்ளூர் மருத்துவமனையில் அனுமதிக்கப்பட்டதாகவும் அவசர மருத்துவப் பிரிவினர் தகவல் வெளியிட்டுள்ளனர்.
சம்பவம் தொடர்பில் விசாரணைகளை மேற்கொண்டுவரும் காவல்துறையினர் இது குறித்து தகவல் வெளியிடுகையில், விசாரணைகள் இன்னமும் ஆரம்ப கட்டத்திலேயே உள்ளதாகவும், வேறு யாராவது காயப்பட்டுள்ளார்களா என்பதனை அறிந்து கொள்வதற்காக குறித்த அந்த கட்டிடத்தில் தேடுதல்கள் மேற்கொள்ளப்பட்டதாகவும், இந்தச் சம்பவத்தில் பல சந்தேக நபர்கள் தொடர்புபட்டுள்ளதாகவும், எனினும் எவரும் கைது செய்யப்படவில்லை என்றும் குறிப்பிட்டுள்ளனர்.
சந்தேக நபர்கள் குறித்த அடையாளங்கள், விபரங்கள் எவையும் உடனடியாக வெளியிடப்படாத நிலையில், சம்பவம் தொடர்பில் மேலதிக தகவல் அறிந்தோர் தம்மைத் தொடர்பு கொள்ளுமாறு காவல்துறையினர் வேண்டுகோள் விடுத்துள்ளனர்.
