நேற்று இரவு ஜேன் மற்றும் ஃபின்ச் குடியிருப்பு பகுதியில் இடம்பெற்ற துப்பாக்கிச் சூட்டுச் சம்பவத்தில் இருவர் கொல்லப்பட்டுள்ளனர்.
Finch Avenue Westற்கு தெற்கே, Jane Street மற்றும் Grandravine Drive பகுதியில் அமைந்துள்ள நகரான்மைக் குடியிருப்புக் கட்டிடத்திற்கு வெளியே, நேற்று இரவு 9:30 அளவில் இந்தச் சம்பவம் இடம்பெற்றுள்ளது.
சம்பவ இடத்தில் இரண்டு ஆண்கள் துப்பாக்கிச் சூட்டுக் காயங்களுடன் காணப்பட்டதாகவும், உயிராபத்தான நிலையில் தீவிர சிகிச்சைப் பிரிவில் அனுமதிக்கப்பட்ட நிலையில், 20 வயது ஆண் ஒருவர் சிறிது நேரத்திலேயே உயிரிழந்து விட்டதாகவும், மற்றையவர் நள்ளிரவு வேளையில் உயிரிழந்ததாகவும் காவல்துறையினர் தெரிவித்துள்ளனர்.
சம்பவ இடத்தில் பெருமளவு துப்பாக்கி வேட்டுக்கள் தீர்க்கப்பட்டதாகவும், துப்பாக்கிப் பிரயோகம் இடம்பெறுவதற்கு முன்னர் அந்தப் பகுதியில் வசிக்காத இரண்டு ஆண்கள் அங்கே சுற்றித் திரிந்ததாகவும் அங்கே வசிப்போர் தெரிவித்துள்ளனர்.
உயிரிழந்தவர்கள் 24 வயதான டெலாவ்ண்டே பிரியன்ட் மற்றும் 20 வயதான எரிக் றோ என அடையாளம் வெளியிடப்பட்டுள்ளது.
இந்தச் சம்பவம் குற்றச் செயல் குழுக்களுடன் தொடர்புடையதாக நோக்கப்படுகிறது. குறித்த இந்த துப்பாக்கிப் பிரயோகம் இடம்பெறுவதற்கு சற்று முன்னதாக இரவு 8:21 அளவிலும், இந்த இடத்திலிருந்து சிறிது தூரத்தில் துப்பாக்கிப் பிரயோகம் இடம்பெற்றுள்ள நிலையில், இந்த இரண்டு சம்பவங்களும் ஒன்றுடன் ஒன்று தொடர்புடையதாக இருக்கும் என்று கருதப்படுகிறது.
