கனேடியப் பெண் ஒருவரின் காதலர் நியூசிலாந்தில் சுட்டுக் கொல்லப்பட்டுள்ள நிலையில், குறித்த இந்தத் துப்பாக்கிச் சூட்டுச் சம்பவத்துடன் தொடர்புடைய சந்தேக நபரைக் கைது செய்துள்ளதாக நியூசிலாந்து காவல்துறையினர் தெரிவித்துள்ளனர்.
நியூசிலாந்தின் கடற்கரை நகரான றக்லானில் குறித்த அந்த கனேடியப் பெண்ணும் அவரது காதலரான அவுஸ்திரேலிய ஆடவரும் சிற்றூர்தி ஒன்றில் தூங்கிக்கொண்டு இருந்த வேளையில், நேற்று வெள்ளிக்கிழமை அதிகாலை 3 மணியளவில் அவர்களை அணுகிய சந்தேக நபர் அவர்கள் மீது துப்பாக்கிப் பிரயோகம் மேற்கொண்டதாகவும், இதன்போது 33 வயதான மக்கினொன் உயிரிழந்துவிட்ட நிலையில், நோவா ஸ்கொட்ஷியாவைச் சேர்ந்த கனேடியப் பெண் காயங்கள் ஏதுமின்றித் தப்பித்துக் கொண்டதாகவும் தெரிவிக்கப்படுகிறது.
இந்தச் சம்பவம் தொடர்பில் விசாரணைகளை மேற்கொண்ட நியூசிலாந்து காவல்துறையினர், அங்குள்ள கிராம வீடு ஒன்றிலிருந்து 23 வயது ஆண் ஒருவரைக் கைது செய்துள்ளதுடன், அவர் மீது கொலை, கொள்ளை, கொலை அச்சுறுத்தல் உள்ளிட்ட பல்வேறு குற்றச்சாட்டுகளைப் பதிவு செய்துள்ளனர். அத்துடன் இந்தக் கைது தொடர்பில் கொலையுண்டவரின் குடும்பத்தாருக்கும் தெரியப்படுத்தப்பட்டுள்ளது.
