இன்று காலை வேளையில் ஈஸ்ட் யோர்க் பகுதியில் துப்பாக்கிப் பிரயோகம் இடம்பெற்றதாக முறைப்பாடுகள் கிடைத்துள்ள நிலையில், அந்தப் பகுதியில் துப்பாக்கிச் சூட்டுச் சத்தத்தைக் கேட்ட மக்களிடம் இருந்து காவல்துறையினர் ஆதாரங்களைச் சேகரித்து வருகின்றனர்.
ஈஸ்ட் யோர்க் தொழிற்சாலைகள் சார் பகுதியில் துப்பாக்கிப் பிரயோகம் இடம்பெறுவதாக இன்று அதிகாலை இரண்டு மணியளவில் தமக்கு முறைப்பாடு கிடைத்ததாக காவல்துறையினர் தெரிவித்துள்ளனர்.
அதனை அடுத்து Victoria Park Avenueவிற்கு மேற்கே, O’Connor Drive மற்றும் Blair Street பகுதியைச் சென்றடைந்த போது, அங்கே துப்பாக்கிப் பிரயோகம் இடம்பெற்றமைக்குச் சான்றாக வெற்றுத் தோட்டாக்கள் காணப்பட்டதாகவும், எனினும் சேதங்கள் எவையும் ஏற்பட்டிருக்கவில்லை என்றும் விசாரணை அதிகாரிகள் தகவல் வெளியிட்டுள்ளனர்.
இந்தச் சம்பவம் தொடர்பில் விசாரணைகள் இடம்பெறுகின்றன போதிலும், இதுவரை எவரும் கைது செய்யப்படவில்லை என்பதுடன், சந்தேக நபர் குறித்த விபரங்களும் வெளியிடப்படவில்லை. அத்துடன் இந்த துப்பாக்கிச் சூட்டுச் சம்பவத்தில் எவரும் காயமடைந்நதாகவும் இதுவரை தகவல் இல்லை என்று கூறப்படுகிறது.
இந்தச் சம்பவம் தொடர்பில் மேலதிக தகவல் அறிந்தோர் தம்மை 416-808-4300 என்ற இலக்கத்தில் தொடர்பு கொள்ளுமாறு காவல்துறையினர் பொதுமக்களிடம் வேண்டுகோள் விடுத்துள்ளனர்.
