நேற்று இரவு நியூமார்கட் பகுதியில் இடம்பெற்ற துப்பாக்கிச் சூட்டுச் சம்பவத்தில் ஆண் ஒருவர் உயிரிழந்து விட்டதாகவும், பெண் ஒருவர் படுகாயமடைந்த நிலையில் மருத்துவமனையில் அனுமதிக்கப்பட்டுள்ளதாகவும் யோர்க் பிராந்திய காவல்துறையினர் தெரிவித்துள்ளனர்.
Yonge Street மற்றும் Mulock Drive பகுதிக்கு தென்மேற்கே, Colter Street பகுதியில், நேற்று இரவு ஒன்பது மணியளவில் இந்தச் சம்பவம் இடம்பெற்றுள்ளது.
குறித்த அந்தப் பகுதியில் துப்பாக்கிப் பிரயோகம் இடம்பெறுவதாக கிடைத்த தகவலை அடுத்து அங்கு விரைந்ததாகவும், அங்கே ஆண் ஒருவர் பலத்த துப்பாக்கிச் சூட்டுக் காயங்களுடனும், பெண் ஒருவர் ஒரு துப்பாக்கிச் சூட்டுக் காயத்துடனும் காணப்பட்டதாக காவல்துறையினர் தகவல் வெளியிட்டுள்ளனர்.
இருவரும் உடனடியாக மருத்துவமனைக்கு அனுப்பி வைக்கப்பட்டதாகவும், குறித்த அந்த ஆண் சிகிச்சைகள் பலனளிக்காத நிலையில் சிறிது நேரத்தில் உயிரிழந்து விட்டதாகவும், பெண் தொடர்ந்து சிகிச்சை பெற்று வருவதாகவும் தெரிவிக்கப்படுகிறது.
உயிரிழந்தவர் மற்றும் காயமடைந்தவரின் பெயர், வயது உள்ளிட்ட விபரங்கள் உடனடியாக வெளியிடப்படவில்லை.
துப்பாக்கிப் பிரயோகம் இடம்பெற்ற வேளையில் அந்தப் பகுதியில் பெருமளவானோர் இருந்ததாக தெரிவிக்கப்படுகின்ற போதிலும், கருமை நிற sedan ரக வாகனம் ஒன்றில் சந்தேக நபர் தப்பிச் சென்றதாக மட்டும் காவல்துறையினரால் அடையாளம் வெளியிடப்பட்டுள்ளது.
அத்துடன் இன்று குறித்த அந்தப் பகுதியில் விசாரணை அதிகாரிகள் வீடு வீடாகச் சென்று தகவல்களைச் சேகரிக்கவுள்ளதாக தெரிவிக்கப்படுகிறது.
