கடந்த வாரம் ஸ்காபரோ ஆர்ம்டேல் குடியிருப்பு பகுதியில் வைத்து 25 வயதான சாரங்கன் சந்திரகாந்தன் என்பவர் சுட்டுக் கொல்லப்பட்ட விவகாரத்தில் விசாரணைகளை மேற்கொண்டுவந்த காவல்துறையினர், தற்போது ஒருவரைக் கைது செய்துள்ளனர்.
கடந்த 19ஆம் திகதி இரவு 9:50 அளவில், மிடில்ஃபீல்ட் வீதிப் பகுதியில், மக்நிக்கோல் அவனியூவில் மேற்கொள்ப்பட்ட இந்த துப்பாக்கிப் பிரயோகத்தில் சாரங்கன் படுகாயமடைந்த நிலையில், சம்பவ இடத்திற்கு விரைந்த அவசர மருத்துவப் பிரிவினர் அவருக்கு உயர்காப்பு சிகிச்சைகளை வழங்கிய போதிலும், அவை பலனின்றி அவர் சம்பவ இடத்திலேயே உயிரிழந்தமை குறிப்பிடத்தக்கது.
குறித்த இந்தச் சம்பவம் தொடர்பில் திங்கட்கிழமை விபரம் வெளியிட்ட காவல்துறையினர், இந்தச் சம்பவத்தின் போது மேலும் ஒருவர் காயமடைந்துள்ளதாகவும், பலத்த காயங்களுக்காக சிகிச்சை பெற்றக்கொண்டுள்ள அவர் உயிர் பிழைத்துள்ளதாகவும் தெரிவித்துள்ளனர்.
இவ்வாறான நிலையில் மேற்கொள்ளப்பட்ட தீவிர விசாரணைகளின் அடிப்படையில், ஞாயிற்றுக்கிழமை Stoufville பகுதியைச் சேர்ந்த 22 வயதான சரன்ராஜ் சிவகுமார் என்பவரைக் கைது செய்துள்ளதாகவும், இரண்டாம் தர கொலைக் குற்றச்சாட்டு மற்றும் கொலை முயற்சிக் குற்றச்சாட்டு என்பன அவர் மீது சுமத்தப்பட்டுள்ளதாகவும் காவல்துறையினர் தகவல் வெளியிட்டுள்ளனர்.
இதேவேளை இந்தச் சம்பவம் தொடர்பில் மேலதிக விபரம் அறிந்தோர் தம்மைத் தொடர்புகொள்ளுமாறும் காவல்துறையினர் வேண்டுகோள் விடுத்துள்ளனர்.
