2024 ஆம் ஆண்டின் முதல் காலாண்டுடன் ஒப்பிடுகையில், 2026 ஆம் ஆண்டின் முதல் மூன்று மாதங்களில் கனடாவுக்கும் அமெரிக்காவுக்கும் இடையிலான வர்த்தகத்தின் மொத்த மதிப்பு சுமார் 2 பில்லியன் டொலர்களால் குறைவடைந்துள்ளது.
2026 ஆம் ஆண்டின் முதல் காலாண்டில் அமெரிக்காவுடனான கனடாவின் மொத்த பொருட்கள் மற்றும் சேவைகள் வர்த்தகம் 0.6 சதவீதம் குறைந்துள்ளதாக கனடா உலக விவகாரத் துறையின் பேச்சாளர் ரேச்சல் டோலன் தெரிவித்துள்ளார்.
2026 ஆம் ஆண்டின் முதல் மூன்று மாதங்களில் கனடா–அமெரிக்கா இடையிலான பொருட்கள் மற்றும் சேவைகளின் மொத்த வர்த்தக மதிப்பு 322.8 பில்லியன் டொலர்களாகப் பதிவாகியுள்ளது. இதில் கனடாவின் ஏற்றுமதி 169.6 பில்லியன் டொலர்களாகவும், இறக்குமதி 153.1 பில்லியன் டொலர்களாகவும் அமைந்துள்ளது.
2024 ஆம் ஆண்டின் இதே காலப்பகுதியுடன் ஒப்பிடுகையில், அமெரிக்காவுக்கான கனடாவின் ஏற்றுமதி 1.6 சதவீதம் குறைந்துள்ளது. அதேவேளையில், அமெரிக்காவிலிருந்து கனடா மேற்கொண்ட இறக்குமதி 0.6 சதவீதம் அதிகரித்துள்ளது.
கடந்த இரண்டு ஆண்டுகளில் இருதரப்பு வர்த்தகத்தில் விலைமதிப்பற்ற கற்கள் மற்றும் உலோகங்கள் தொடர்பான வர்த்தகம் 2.8 பில்லியன் டொலர்களால் அதிகரித்து, குறிப்பிடத்தக்க வளர்ச்சியைப் பதிவு செய்துள்ளது.
மேலும், கொக்கோ மற்றும் அது சார்ந்த பொருட்களின் வர்த்தகம் 52 சதவீதமும், விமானங்கள் மற்றும் அவற்றின் பாகங்கள் தொடர்பான வர்த்தகம் 15.5 சதவீதமும் அதிகரித்துள்ளன.
ஏற்றுமதித் துறையைப் பொறுத்தவரை, கொக்கோ மற்றும் அது சார்ந்த பொருட்களின் ஏற்றுமதி 58.8 சதவீதமும், மின்னணு சாதனங்களின் ஏற்றுமதி 9.2 சதவீதமும் அதிகரித்துள்ளன. உப்பு, கந்தகம், மண், கல் மற்றும் சிமென்ட் உள்ளிட்ட பொருட்களின் ஏற்றுமதி 57.9 சதவீத வளர்ச்சியைப் பதிவு செய்துள்ளது.
மறுபுறம், கனடா–அமெரிக்கா இருதரப்பு வர்த்தகத்தில் மிகப்பெரிய சரிவு மோட்டார் வாகனங்கள் மற்றும் அவற்றின் உதிரிப் பாகங்கள் துறையில் ஏற்பட்டுள்ளது. இத்துறையின் வர்த்தகம் 18.9 சதவீதம் அல்லது 6.7 பில்லியன் டொலர்களால் வீழ்ச்சியடைந்துள்ளது.
இரும்பு மற்றும் எஃகு தொடர்பான வர்த்தகம் 43.5 சதவீதம் குறைந்துள்ளதுடன், கனிம எரிபொருட்கள் மற்றும் எண்ணெய் வர்த்தகமும் 3.3 சதவீதம் சரிவடைந்துள்ளது.
கனடா–அமெரிக்கா–மெக்சிகோ வர்த்தக ஒப்பந்தமான CUSMA தொடர்பான முறையான பேச்சுவார்த்தைகள் நடைபெறுவதற்கு முன்னதாக, கனடா மீதான அழுத்தத்தை அமெரிக்கா அதிகரித்து வரும் நிலையில் இந்த வர்த்தகச் சரிவு பதிவாகியுள்ளது.
அத்துடன், கனடிய பொருட்கள் மீது புதிய வரிகளை விதிக்கப்போவதாக அமெரிக்க அதிபர் டொனால்ட் டிரம்ப் எச்சரித்துள்ள சூழ்நிலையும் இரு நாடுகளுக்கிடையிலான வர்த்தக உறவுகளில் நிச்சயமற்ற நிலையை ஏற்படுத்தியுள்ளது.
அமெரிக்காவுக்கான கனடாவின் பொருட்கள் மற்றும் சேவைகளின் மொத்த ஏற்றுமதி 2024 ஆம் ஆண்டில் 709.6 பில்லியன் டொலர்களாக இருந்த நிலையில், 2025 ஆம் ஆண்டில் அது 683.3 பில்லியன் டொலர்களாகக் குறைந்திருந்தது.
அதேபோன்று, அமெரிக்காவிலிருந்து கனடா மேற்கொண்ட இறக்குமதி 2024 ஆம் ஆண்டில் 618.3 பில்லியன் டொலர்களாக இருந்த நிலையில், 2025 ஆம் ஆண்டில் 604.1 பில்லியன் டொலர்களாகக் குறைந்திருந்தமை குறிப்பிடத்தக்கது.
Comments are closed, but trackbacks and pingbacks are open.