கனடாவின் நியூ பிரன்ஸ்விக் மாகாணத்தில், தனது மனைவியைக் கொடூரமாகக் கொலை செய்து, உடலைத் துண்டு துண்டாக வெட்டிய கணவனுக்கு ஆயுள் சிறைத்தண்டனை விதித்து நீதிமன்றம் தீர்ப்பளித்துள்ளது.
நியூ பிரன்ஸ்விக் மாகாணத்தின் சாக்க்வில் (Sackville) பகுதியைச் சேர்ந்த 65 வயதான ரோஜர் ஹில்யார்ட் கிராஸ்மேன் (Roger Hilyard Crossman) என்பவருக்கே இந்தத் தண்டனை விதிக்கப்பட்டுள்ளது.
இரண்டாம் நிலைக் கொலைக் குற்றத்தை ஒப்புக்கொண்ட அவருக்கு ஆயுள் சிறைத்தண்டனை விதிக்கப்பட்டுள்ளதுடன், 24 ஆண்டுகளுக்கு பிணையில் விடுதலை பெற விண்ணப்பிக்க முடியாது எனவும் நீதிமன்றம் உத்தரவிட்டுள்ளது.
மேலும், மனித உடலை அவமதித்த குற்றத்திற்காக ஐந்து ஆண்டுகள் சிறைத்தண்டனையும் விதிக்கப்பட்டுள்ளது. இந்தத் தண்டனை ஆயுள் தண்டனையுடன் ஒரே நேரத்தில் அனுபவிக்கப்படவுள்ளது.
கடந்த 2023ஆம் ஆண்டு ஒக்டோபர் 12ஆம் திகதி, சாக்க்வில் பகுதியில் உள்ள வீட்டில் 59 வயதான மார்லீன் கிராஸ்மேன் (Marlene Crossman) கொலை செய்யப்பட்டார்.
திரையரங்கில் பணியாற்றி வந்த மார்லீன் வழக்கம்போல் வேலைக்கு வராததால் சந்தேகமடைந்த அவரது மேலாளர், வீட்டிற்குச் சென்று பார்த்துள்ளார். பின்னர் பொலிஸாருக்குத் தகவல் வழங்கப்பட்டது.
சம்பவ இடத்திற்கு விரைந்த பொலிஸார், வீட்டிற்குள் மார்லீனின் உடல் பல பாகங்களாகத் துண்டிக்கப்பட்டிருந்ததைக் கண்டுபிடித்தனர்.
அவரது தலை, கை மற்றும் கண் உள்ளிட்ட உடல் பாகங்கள் துண்டிக்கப்பட்டிருந்ததுடன், துண்டிக்கப்பட்ட கைக்கு அருகில் கேலியான வாசகம் எழுதப்பட்ட குறிப்பொன்றும் காணப்பட்டதாக நீதிமன்றத்தில் தெரிவிக்கப்பட்டது.
உடற்கூறாய்வு அறிக்கையின்படி, மார்லீனின் நெஞ்சு மற்றும் வயிற்றுப் பகுதிகளில் கத்தியால் குத்தப்பட்ட காயங்களே அவரது உயிரிழப்பிற்குக் காரணம் என உறுதிப்படுத்தப்பட்டது.
கொலை இடம்பெற்ற அதே நாளில், ரோஜர் கிராஸ்மேன் நோவா ஸ்கோஷியா மாகாணத்தில் உள்ள அன்டிகோனிஷ் பொலிஸ் நிலையத்தில் சரணடைந்தார்.
சுமார் 37 ஆண்டுகளாகத் திருமண வாழ்க்கையில் இருந்த இந்தத் தம்பதியினருக்கு இரண்டு மகன்கள் உள்ளனர்.
இந்நிலையில், நவம்பர் 2ஆம் திகதி மொன்க்டன் நீதிமன்றத்தில் நடைபெற்ற தண்டனை அறிவிப்பு விசாரணையின்போது, ரோஜர் கிராஸ்மேன் நேரடியாக நீதிமன்றத்தில் ஆஜராகவில்லை.
நான்காம் கட்ட நிணநீர் புற்றுநோயால் பாதிக்கப்பட்டுள்ள அவர், மருத்துவமனையில் அனுமதிக்கப்பட்டிருந்த நிலையில் காணொளி வாயிலாக விசாரணையில் பங்கேற்றார்.
அவரது உடல்நிலை மிகவும் மோசமாக இருப்பதாகவும், இன்னும் சில வாரங்களே உயிர்வாழக்கூடும் எனவும் அவரது சட்டத்தரணி நீதிமன்றத்தில் தெரிவித்தார்.
இருப்பினும், குற்றத்தின் கொடூரத்தன்மையைக் கருத்திற்கொண்டு நீதிமன்றம் ஆயுள் சிறைத்தண்டனை விதித்துள்ளது.
இந்த வழக்கின் தீர்ப்பு, பாதிக்கப்பட்ட பெண்ணின் குடும்பத்தினருக்கு மூன்று ஆண்டுகளுக்குப் பின்னர் கிடைத்த நீதியாக அமைந்துள்ளது.
Comments are closed, but trackbacks and pingbacks are open.