கனடாவில் பாலியல் ரீதியாகப் பரவும் தொற்று நோய்களின் பாதிப்பு கவலைக்கிடமான அளவில் அதிகரித்துள்ளதாக, கனடாவின் தலைமைப் பொது சுகாதார அதிகாரி வெளியிட்டுள்ள சமீபத்திய அறிக்கையில் எச்சரிக்கப்பட்டுள்ளது.
குறிப்பாக, கடந்த பத்து ஆண்டுகளில் சிஃபிளிஸ் (Syphilis) எனப்படும் பாலியல் தொற்றுநோயின் பாதிப்பு நான்கு மடங்கிற்கும் அதிகமாக உயர்ந்துள்ளதுடன், இந்தத் தொற்றுடன் பிறக்கும் குழந்தைகளின் எண்ணிக்கையும் அதிகரித்துள்ளதாகத் தெரிவிக்கப்பட்டுள்ளது.
அறிக்கையின்படி, 2014 முதல் 2023 வரையிலான காலப்பகுதியில் தொற்றைப் பரப்பக்கூடிய சிஃபிளிஸ் பாதிப்பு விகிதம் நான்கு மடங்கிற்கும் அதிகமாக அதிகரித்துள்ளது.
அதேவேளை, 2018 முதல் 2023 வரையிலான காலப்பகுதியில் பிறவிச் சிஃபிளிஸ் (Congenital Syphilis) பாதிப்பு விகிதம் மூன்று மடங்கிற்கும் மேலாக உயர்ந்துள்ளது.
கர்ப்பிணித் தாயிடமிருந்து கர்ப்பகாலத்திலோ அல்லது பிரசவத்தின்போதோ குழந்தைக்குச் சிஃபிளிஸ் தொற்று பரவக்கூடும். உரிய நேரத்தில் கண்டறிந்து சிகிச்சையளிக்கப்படாவிட்டால், கருச்சிதைவு, குழந்தை இறந்து பிறத்தல், பிறந்த குழந்தையின் உயிரிழப்பு மற்றும் நீண்டகால உடல்நலப் பாதிப்புகள் போன்ற கடுமையான விளைவுகளை இந்தத் தொற்று ஏற்படுத்தக்கூடும்.
இது தொடர்பாகக் கருத்துத் தெரிவித்த யோர்க் பிராந்திய சுகாதார அதிகாரி டொக்டர் ஃபரீன் கராச்சிவாலா, குழந்தைகள் சிஃபிளிஸ் தொற்றுடன் பிறப்பது மிகவும் கவலையளிக்கும் விடயமாகும் எனத் தெரிவித்துள்ளார்.
கர்ப்பகால மருத்துவப் பரிசோதனைகளிலும் தொற்றைக் கண்டறிந்து உரிய சிகிச்சை வழங்கும் நடைமுறைகளிலும் உள்ள குறைபாடுகளை இது வெளிப்படுத்துவதாகவும் அவர் சுட்டிக்காட்டியுள்ளார்.
இதற்கிடையில், 2023ஆம் ஆண்டில் சிஃபிளிஸ் பாதிப்பு விகிதம் முந்தைய ஆண்டைவிடக் குறைந்திருந்தபோதிலும், இந்தச் சரிவு தொடருமா என்பதை உறுதிப்படுத்த மேலதிக தரவுகள் தேவைப்படுவதாகப் பொது சுகாதார அறிக்கை தெரிவித்துள்ளது.
சிஃபிளிஸ் தொற்றை ஆரம்ப நிலையிலேயே கண்டறிந்து உரிய சிகிச்சை பெறுவதன் மூலம் கடுமையான பாதிப்புகளைத் தவிர்க்க முடியும் எனச் சுகாதார அதிகாரிகள் வலியுறுத்தியுள்ளனர்.
குறிப்பாக, கர்ப்பிணிப் பெண்கள் உரிய காலங்களில் மருத்துவப் பரிசோதனைகளை மேற்கொள்வதும், தொற்று கண்டறியப்பட்டால் தாமதமின்றிச் சிகிச்சை பெறுவதும் குழந்தைகளின் உயிரைப் பாதுகாப்பதற்கு மிகவும் அவசியமானது என அறிவுறுத்தப்பட்டுள்ளது.
Comments are closed, but trackbacks and pingbacks are open.