ஒஷாவா வீட்டுத்திட்டப் பகுதியில் வைத்து மேற்கொள்ளப்பட்ட துப்பாக்கிச் சூட்டுத் தாக்குதலில் 18 வயது இளைஞர் ஒருவர் கொல்லப்பட்டுள்ளார்.
Ritson Road மற்றும் Taunton Road பகுதியில், Pentland Streetஇல் உள்ள குடியிருப்புப் பகுதியில் துப்பாக்கிச் சூட்டுச் சத்தங்கள் கேட்பதாக நள்ளிரவு வேளையில் கிடைத்த பல முறைப்பாடுகளை அடுத்து அங்கு விரைந்ததாகவும், சம்பவ இடத்தில் பல துப்பாக்கிச் சூட்டுக் காயங்களுடன் காணப்பட்ட இளைஞர் அங்கேயே உயிரிழந்து விட்டதாகவும் காவல்துறையினர் தெரிவித்துள்ளனர்.
விசாரணைகள் மிகவும் ஆரம்ப நிலையிலேயே உள்ளதனால், தற்போதைக்கு சந்தேக நபர்கள் உள்ளிட்ட எந்தவித விபரங்களையும் வெளியிடமுடியாதுள்ளதாகவும், அந்தப் பகுதியில் விசாரணைகளை முன்னெடுத்து வருவதாகவும், சம்பவத்தை நேரில் பார்த்தோர் யாராவது இருந்தால், அல்லது அது குறித்து ஏதாவது தகவல் அறிந்திருந்தால் தம்மைத் தொடர்பு கொள்ளுமாறும் காவல்துறையினர் வேண்டுகோள் விடுத்துள்ளனர்.
உயிரிழந்தவரின் பெயர் விபரங்களும் உடனடியாக வெளியிடப்படாத நிலையில், விசாரணைகள் தொடர்கின்றன.
